張晨:一句Yes/No好難答!
18‧3‧2015 / HE LOVES

前幾晚Mary打俾我,一拎起電話對面就傳嚟一陣驚天爆喊聲!
個震撼性比得上有個阿叔無拿拿用震撼聲「睇住呀!!!」同「而夜依野惹爺耶夜依野」
一個女仔可以喊得咁淒厲只有兩個可能性,就係「好唔開心」或者「好傷心」..

正當我擔心Mary係俾人「捉人深處輪姦」想報警之際。Mary嚟個內心剖白:「我..我逼Edison表態,問佢究竟鐘意我定唔鐘意我,佢死都唔肯答!!Yes or No之嘛!真係咁難答咩!!唔鐘意咪等我死咗條心囉!鐘意咪一齊囉!佢好賤呀!!」

我即刻想Cut佢線。

因為呢句Yes or No,從來都唔易答。
呢個世界唔係得黑白,你問政府得定唔得,佢有邊次可以好瀟灑咁答「得」或「唔得」呀?佢哋都係用「施政藍圖」「公眾咨詢」再Crossover「有關當局」嚟耍你,簡單就係唔答囉。

好似Mary個Case咁,佢鐘意Edison,要人表態。Yes就一齊;No佢就死心。呢種一刀切嘅問題方法,男人真係唔知點答。
衰啲講句,佢唔答Yes其實已經答咗啦。
如果佢都當你女神,晨早已經狗衝咗。就算佢真係想Yes,都未必想呢家Yes,講真每個人不論男女,知道有人對自己有意思,就算唔想「呢家一齊」,都難保唔會「第日一齊」。買個保險就會令呢段感情維持「好感」狀態!

你可能會話「哇!咁拖住人唔會好自私咩?」
係呀,係有少少自私架。但人人都會自私,Edison唔開啲「空頭支票」俾Mary都算有品。佢大可以Say “Yes”之後騎牛搵馬,一有個更好嘅對象出現,就當Mary係鐵餅一樣使出全力「飛」佢出場邊。

同埋你諗下,Mary咁問法其實都係自私喎!佢逼人答個背後Meaning咪就係諗咗自己先。想即刻有個答案自己唔使煩。

就好似大家約去邊度食飯,之後加句「你話事啦」咁張個波拋俾人一樣!都係不負責任。

Mary會諗:「點解你唔答?」
個男人就諗:「點解你要問?」
其實佢無義務答你架。佢又唔係你邊個!

加上你問得yes/no,自己一定有個前設答案。而Mary心底當然係想Edison答yes啦。所以即使Edison答No,Mary都會問點解No。
咁Edison唔通直接一棍ban落去:「咁係唔鐘意呀嘛八婆!」
紳士係唔會咁絕架嘛!
所以咪又係話咩「做嘢好忙」/「未放底前度」/「想單身多一段時間」等等…
Mary聽到會點?
咪「我唔會咁痴身架」/「我幫你放底佢啦」/「咁你想單身到幾時,I WAIT FOR YOUUU」

Edison答咩都死,yes or no根本就係陷阱!
所以有時你發現身邊嗰位男士而對Yes/No問題笑而不語,唔代表佢逃避、唔代表佢唔尊重你。
係因為佢明白當你問Yes/No嘅時候,呢個問題根本就唔會隨住一個Yes or No嘅答案去結束。

HAR16003C/AUG

真係有心解決問題,一定要心平氣和,慢慢去同對方講自己嘅感受,唔好下下都出必殺技Yes/No,你強硬對方拳頭更硬!同埋男人呢,都係受軟多啲嘅...