張晨:別以為他會一直傻下去
22‧1‧2015 / HE LOVES

女孩子很多時候都認為自己是童話故事中的公主。
而童話故事有一個特點,就是結尾總是「王子與公主從此快快樂樂地生活下去」。

呢個時候問題嚟啦!點為知「快快樂樂地生活下去」呢?又點解本故事書唔寫埋落去呢?其實非常簡單。

係故事入面王子為公主粉身碎骨咩都得,拎住把都唔知有無過ISO 9000嘅劍仔都夠彊去撼千軍萬馬、單拖成為7個小矮人嘅情敵、得對鞋都要玩全國強制性尋人。

傻事睇落多蘿蘿,但其實已經節錄哂王子呢世最「傻」嘅部份,咁未來點?咪就黎「快快樂樂地生活下去」囉,其實好平淡架咋!所以本故事書唔寫落去,因為真係「無咩好寫」,佢哋人生最精華係哂到。

子華神都講過,男人最浪漫嘅引擎可以開到240Km/Hr。但問題係個引擎開3日就會打柴!
嗰段時間掟灣飄移,加油落斜。驚奇、刺激、好玩,畢生難忘。
之但係當個引擎turn down之後會點?亦都係「快快樂樂地生活下去」。

個引擎未至少死哂,但一定唔會長開!
好多女仔個腦海都會記住「風馳電掣」嘅36小時,就好似童話書嗰36頁一樣。
佢哋意識唔到嗰36頁其實係講梗「3Day」內發生嘅事,而最後個句「王子與公主從此快快樂樂地生活下去」係記載梗之後36年嘅事。

所以好容易會覺得個男仔無咁著緊佢,激情已經淡化,自己就變咗悲劇主角,一個被「選上又愛過再始亂終棄」嘅女人,係「茱麗葉」加「林黛玉」再乘以「小龍女」咁慘。(切忽將小龍女幻想成陳妍希)

其實有時你慘,你男人更慘。因為你嘅要求等於要長開個「浪漫引擎」。佢即使愛你,都只係一個「基因生命體」。簡單啲,即係佢都會攰。

一段關係由熱戀漸趨平淡係正常不過嘅鐵則。係「無論你不接受亦必需要接受」嘅現象。如果有對情侶同你講「我同我老公廿幾年都係熱戀期」的話,一係佢呃你,一係佢哋根本無「熱戀」過,直入平淡。

坦白講,一個男人唔再做啲「瘋狂行為」唔代表佢對你無感情,佢唔傻落去係因為現實社會環境上,佢需要付出時間喺其他範疇上。同時對你已經產生一定安全感,認為大家可以平淡自然地成為彼此生活嘅一部份。

「浪漫引擎」唔係日日開,做好保養,因為每年仲有聖誕、生日、除夕、情人節、周年紀念等等要郁一郁,年期八十年。正好就係一句「王子與公主從此快快樂樂地生活下去」。

HAR16003C/AUG

女孩總擔心他會變。但「變」是不可避免。變得冷淡是心痛;變得平淡是幸福。我知妳們都是公主,他們也還是當妳們是公主,只是你不再沉睡於巫女的魔咒之中,而是手牽手與他「快快樂樂地生活下去」。