張晨:BB話,連核戰爭都可以化解!
1‧4‧2015 / HE LOVES

「你依家咩態度呀!」
「你咁惡做咩啫!」

都唔使講咁多,你已經Feel到龐貝古城嘅情境!龐貝古城即係咩?即係火山爆發俾火山灰完全覆蓋囉~

你有時都唔明,嗰日原本好好哋,諗住甜甜蜜蜜過一Day。但講錯一句足以致命!
想佢開心要用一百句,要激嬲佢就只需要半句!

點為止半句?即係「頂你個肺呀」,你嗡完「頂你..」佢已經會領悟出川劇最強奧義-「變臉」。
「你講多次!!」瞬間變臉,即時還撃!
世界大戰抹黑了宇宙,Can You Feel?

雖則我成日都提住自己要心平氣和,但人人都有情緒。
撞正嗰日心情麻麻,對面嗰個仲要窒頭窒勢,你真係想渣緊中指,大聲咆哮一句:
「你講夠未呀!你依個買衫要試四次,食飯要影十次相,仲有幾十個美圖APP係身嘅港女!你可恥!你唔體諒我!」

所謂愛嘅反面係恨呀,咁睇得佢你真係好愛佢。如果對方聽你咁講,會點?你死硬啦,因為佢仲愛你!你一句就還返俾你有突:
「無鬼用!!小小事搵我嚟出氣!你依個月薪同拎綜援差唔多,搭巴士成日俾少兩毫子,八達通仲要負錢嘅縮骨精!你食屎啦!」

你好難受,因為你真係成日俾少兩毫子…
去到依個位,大家都豁出去,所謂甜蜜晚餐變成「最後的晚餐」。

老友阿強就話,當你真係火山爆發嘅時候,不如試下用BB話。
一聽到BB話,我心底是拒絕的!喂,即係俊俊~欣欣~樂樂~盈盈~BB~咁喎…有啲難開口啫。

阿強就話,唔係叫你秒秒講,等你火爆時刻先出嘅殺手鐧,令火山沉睡。試諗一下,如果我嗰句變成「BB你講夠未呀!你依個買衫要試四次,食飯要影十次相,仲有幾十個美圖APP係身嘅可愛小公主!BB可恥!BB你唔體諒人!」淨係打字都毛管戙!

講真,你女友聽到你咁講,最多覺得你無厘頭,或者以為你壓力太大痴咗線。總而言之,當你BB話多幾句,你都慢慢平復返,就一笑而過。大家拖拖手手去食茶記。

其實BB話除咗甜蜜蜜時講,喺嬲到爆嘅時候都可以用。
作用同Msg嘅Emoji係一樣。

好多時,大大聲聲發洩,9成都後悔。咁不如用BB話!

BB話翻譯器: http://bit.ly/BBsaid

HAR16003C/AUG

雖然BB話係有啲肉麻,不過愛情係麻目嘅,想講咪講囉。不過有時發現身邊人心情唔好,大家都要遷就一下,就下就下,咁就一世架啦。